Pjesëtarë të lartë të Ministrisë së FSK-së dhe FSK-së, për katër ditë rresht ndoqën trajnimin me temë: “Ndërtimi i Integritetit për Liderët e Lartë“, të mbajtur nga instruktorë të Akademisë së Mbrojtjes të Mbretërisë së Bashkuar.

Në ditën e parë të trajnimit, ministri i MFSK-së, Haki Demolli, falënderoi Mbretërinë e Bashkuar për mbështetjen e tyre të vazhdueshme dhe për bashkëpunimin e ngushtë me MFSK-në dhe FSK-në.

Ndërkaq, ambasadori i Mbretërisë së Bashkuar në Republikën e Kosovës, Ruairi O’Connell premtoi ndihmë për FSK-në edhe në të ardhmen, duke theksuar se FSK-ja është institucioni më i besuar për qytetarët e Kosovës.

Në përmbyllje të këtij trajnimi, sot nën organizimin e Ambasadës së Mbretërisë së Bashkuar, u mbajt ceremonia e certifikimit për pjesëmarrësit e këtij trajnimi.

Me këtë rast, komandanti i FSK-së, gjenerallejtënant Rrahman Rama vlerësoi lart ndihmën e pakursyer të Akademisë së Mbrojtjes të Mbretërisë së Bashkuar që po jep për shkollimin dhe trajnimin e pjesëtarëve të FSK-së.

Gjeneral Rama tha se këto trajnime janë me interes të veçantë për FSK-në, sepse janë të lidhura drejtpërdrejtë me ngritjen e integritetit të saj.

“Kurs i Zhvillimit të Integritetit për udhëheqës të lartë fokusohet tek kolonelët/nënkolonelët dhe më lart, në grada ekuivalente ushtarake dhe civile, nga sektori i gjerë i mbrojtjes dhe sigurisë, për të shqyrtuar aspektet kryesore të adresimit të rrezikut të korrupsionit në kuadër të sektorit të mbrojtjes dhe sigurisë, në fushat e financave, blerjeve dhe prokurimit, menaxhimit të resurseve njerëzore dhe tek operativa. Ne aspirojmë të jemi pjesë e NATO-s. NATO-ja tashmë ka një Politikë të Zhvillimit të Integritetit, e cila është nënshkruar nga 28 shtetet në Samitin e Varshavës, në korrik të vitit 2016, dhe është edhe një nder kriteret kryesore për të qenë pjesë e saj”, tha gjeneral Rama.

Në fund komandanti i FSK-së së bashku me instruktorët e trajnimit, pjesëmarrësve të seminarit ju ndanë certifikata, ndërsa instruktorëve të Akademisë së Mbrojtjes së Mbretërisë së Bashkuar: Dave Allen, Lesley Pellett dhe Jackie Daves, në shenjë vlerësimi dhe respekti për punën e tyre, gjeneral Rrahman Rama ju ndau mirënjohje.